*आ. संदीप क्षीरसागर यांनी एका बातमीची घेतली दखल; दोन प्रश्नांना दिली बगल!*

*खासबाग-मोमीनपुरा जोडणारा बिंदुसरा नदीवरील नियोजित पुल आणि महेदवीया दायरा कब्रस्तानच्या संरक्षक भिंतीचा विसर?*

बीड (एस.एम.न्युज़) - विधानसभा मतदारसंघाचे विद्यमान आमदार संदीप क्षीरसागर यांच्यासह माजी आमदारांना उद्देशून काही दिवसांपूर्वी शहरातील काही मुख्य रस्त्यांविषयी केलेल्या बातमीची दखल घेत आमदारांनी राज्याचे उपमुख्यमंत्री, अर्थमंत्री तथा बीड जिल्ह्याचे पालकमंत्री ना. अजित पवार यांच्या बीड दौऱ्यावेळी रस्त्यांच्या कामांची लांबलचक यादी निवेदन रुपात त्यांच्यासमोर सादर केली. मात्र दुसरीकडे फक्त बीड शहरच नाही तर जिल्हावासियांसाठी अत्यंत जिव्हाळ्याचा असलेला खासबाग-मोमीनपुरा हा मोठा भाग जोडणाऱ्या बिंदुसरा नदीवरील नियोजित पुलाविषयी तसेच ऐतिहासिक महेदवीया दायरा कब्रस्तान च्या संरक्षक भिंतींच्या बांधकामाविषयी च्या प्रश्नांना बगल दिली आहे. यामुळे पालकमंत्री अजित पवार यांच्यासमोर आमदार संदीप क्षीरसागर यांनी विकास कामांसाठी केलेली शिष्टाई कहीं खुशी-कही गम प्रमाणे झाली आहे.

राज्याचे उपमुख्यमंत्री तथा बीड जिल्ह्याचे पालकत्व स्वीकारलेले पालकमंत्री ना. अजित पवार बीड ला येणार म्हटले की, जातीने उपस्थित राहून मतदारसंघाचे इत्यंभूत गऱ्हाणे मांडणारा लोकप्रतिनिधी म्हणून आमदार संदीप क्षीरसागर नेहमी अजित पवारांसमोर ठामपणे उभे राहतात. बीड जिल्ह्याचे पालकमंत्री असल्याने नुकतेच अजित पवार दोन दिवसाच्या दौऱ्यावर आले आहेत. यावेळी बीड विधानसभा मतदारसंघातील रस्ते आणि इतर विकास कामांच्या संदर्भात आ. संदीप क्षीरसागर यांनी त्यांच्याकडे मागणी केली. जिल्ह्याच्या सर्वांगीण विकासाच्या दृष्टीने अनेक प्रश्न आणि बाबींकडे बैठकांच्या माध्यमातून ना. अजित पवार यांनी नियोजन सुरू केले आहे. या अनुषंगाने गुरूवार दिनांक 07 ऑगस्ट 2025 रोजी झालेल्या बैठकीत आ. संदीप क्षीरसागर यांनी बीड विधानसभा मतदारसंघातील विकासाचे विविध प्रश्न आणि प्रस्ताव बैठकीत त्यांच्या समोर मांडले. तेव्हा ना. अजित पवार यांनी जागेवरच संबंधित अधिकाऱ्यांना प्रस्तावांच्या संदर्भात सकारात्मक सूचना दिल्या.

*आ. संदीप क्षीरसागर यांनी दिलेल्या निवेदनातून मांडलेले मुद्दे*

1) राष्ट्रीय महामार्ग 211 (नवीन क्र.52) महालक्ष्मी चौक ते जालना रोड ते छत्रपती शिवाजी महाराज चौक रस्ता या दोन्ही साईडने सहा (6) लाईन रोडसाठी व दोन्ही साईडने ड्रेनेजसाठी सार्वजनिक बांधकाम विभागाला सूचना द्या. 2) शिवशारदा ते अमरधाम स्मशानभुमी पर्यंत भुयारी गटारसाठी सूचना द्या. 3) ग्रामीण भागातील मुख्य रस्ते, प्राथमिक आरोग्य केंद्रे, उपकेंद्रे, शाळा खोली, अंगणवाडी बांधकाम, पाणी पुरवठा व्यवस्था, जन सुविधेअंतर्गत स्मशानभुमी बांधकाम, पशु वैद्यकीय दवाखाने, वन विभागाचा विकास, कोल्हापुरी पद्धतीने बंधारे, सिमेंट नाला बंधारे या व इतर आवश्यक असलेली विकास कामे करणे. बीड शहरातील अनेक रस्त्यांची दुरावस्था झाली आहे. शहरातील रहदारीसाठी रस्त्यांच्या अवस्थेमुळे मोठी अडचण होत आहे‌. बीड शहरातील रस्त्यांचा प्रश्न हा नागरिकांच्या दृष्टीने जिव्हाळ्याचा झाला आहे. यामुळे शहरातील रस्त्यांच्या विकासासंदर्भात प्रस्ताव देऊन बीड शहरातील रस्त्यांचा प्रश्न मार्गी लावण्याची मागणी केली. पालवण चौक ते नगर रोड (धानोरा रोड), मदर टेरेसा चौक ते कालिका नगर कमान (अंकुशनगर मुख्य रस्ता), बीड न.प.अंतर्गत प्रभाग क्र. 7 मध्ये बलभीम चौक ते धोंडीपुरा मार्गे माळीवेस सिमेंट रस्ता करणे, बीड न.प.अंतर्गत प्रभाग क्र.8 छत्रपती शिवाजी महाराज पुतळा ते राजुरी वेस पर्यंत सिमेंट रस्ता व नाली बांधकाम करणे, बीड न.प.अंतर्गत प्रभाग क्र.08 मध्ये कारंजा टावर ते पिंगळे गल्ली ते बुंदेलपुरा मस्जिद रोड पर्यंत सी.सी. रस्ता व नाली बांधकाम करणे, बीड न.प.अंतर्गत प्रभाग क्र.08 मध्ये राजुरी वेस ते बलभीम चौक व राजुरी वेस बुंदेलपुरा मार्ग कबाड गल्ली पर्यंत सी.सी.रस्ता व नाली बांधकाम करणे, बीड न.प.अंतर्गत प्रभाग क्र.8 मध्ये राजुरीवेस-बुंदेलपुरा-कबाडगल्ली मार्गे माळीवेस सिमेंट रस्ता करणे. या कामांना मंजुरी देण्याची मागणी आ. संदीप क्षीरसागर यांनी केली आहे.

*आ.संदीप क्षीरसागरांना या दोन्ही प्रश्नांचा विसर की बगल?*

राज्याचे उपमुख्यमंत्री, अर्थमंत्री तथा बीड जिल्ह्याचे पालकमंत्री ना. अजित पवार यांना दिलेल्या निवेदनात आ. संदीप क्षीरसागर यांनी भली मोठी विकास कामांची यादी दिली असली तरी त्यात खासबाग-मोमीनपुरा जोडणाऱ्या बिंदुसरा नदीवरील नियोजित पुलाच्या कामाचा उल्लेख नाही तसेच जवळपास साडेचारशे वर्षांपासून बीड शहराच्या मोमीनपुरा भागात असलेल्या ऐतिहासिक महेदवीया दायरा कब्रस्तानच्या संरक्षक भिंती बांधून देण्याचा साधा उल्लेख ही केलेला नाही. हे दोन्ही प्रश्न आ. संदीप क्षीरसागर विसरले की, या दोन्ही प्रश्नांना जाणूनबुजून बगल देण्यात आली? असा प्रश्न आता उपस्थित होऊ लागला आहे.